एक करोड सहयोग हस्तान्तरण गर्दै एनआरएनए अध्यक्षले भने : ‘विश्वभरका नेपाली जुटेका छौं’
काठमाडौं । गैरआवासीय नेपाली संघ (एनआरएनए)ले भोटेकोशी तथा त्रिशूली नदीमा आएको बाढीबाट प्रभावित नागरिकको उद्धार, राहत, पुनर्स्थापना तथा मानवीय सहयोगका लागि नेपाल सरकारको प्रधानमन्त्री दैवी प्रकोप उद्धार कोषमा एक करोड रुपैयाँ सहयोग गरेको छ ।
सोमबार एनआरएनएका पदाधिकारीसहितको टोलीले परराष्ट्र मन्त्रालय पुगेर परराष्ट्रमन्त्री शिशिर खनाललाई एक करोड रुपैयाँको चेक हस्तान्तरण गरेको हो ।
सहयोग रकम हस्तान्तरण कार्यक्रममा परराष्ट्रमन्त्री खनालले बाढी तथा पहिरोबाट भएको क्षति तत्कालीन उद्धार तथा राहतमा मात्र सीमित नरहेको भन्दै पुनर्स्थापना र पुनर्निर्माणका लागि समेत ठूलो स्रोत आवश्यक पर्ने बताए ।
उनले विपद्पछि तत्काल उद्धारसँगै जनस्वास्थ्य, शव व्यवस्थापन, राहत वितरण तथा विस्थापित नागरिकको व्यवस्थापनमा ध्यान दिनुपर्ने बताए ।
ठूलो संख्यामा नागरिकले घरबार तथा व्यवसाय गुमाएकाले त्यसपछि निजी तथा सार्वजनिक संरचनाको पुनर्निर्माण गर्नुपर्ने अवस्था रहेको उनको भनाइ थियो ।
मन्त्री खनालले अर्थमन्त्रीले प्रारम्भिक अनुमानका आधारमा विपद्बाट करिब पाँच अर्ब अमेरिकी डलर बराबरको क्षति भएको हुनसक्ने सार्वजनिक रूपमा बताएको उल्लेख गर्दै नेपाल सरकारले मात्रै पुनर्निर्माण गर्न नसक्ने बताए ।
उनले भने, ‘अहिलेको प्रारम्भिक चरणपछि अझै थुप्रै हाम्रा आवश्यकताहरू बढ्दै जानेछन् र ती आवश्यकताहरू नेपाल सरकार एक्लै गर्न सक्छौं भन्ने लाग्दैन ।’
उनले उद्धार तथा राहतसँगै पुनर्स्थापना र पुनर्निर्माणका चरणमा समेत अन्तर्राष्ट्रिय समुदायको सहयोग आवश्यक रहेको बताए ।
मन्त्री खनालले एनआरएनएसँग सबै चरणमा सहकार्य हुने विश्वास व्यक्त गर्दै राहत वितरण गर्दा स्थानीय तहसँग समन्वय गर्न आग्रह गरे ।
उनले राहत वितरणमा दोहोरोपन नहोस् र वास्तविक पीडितसम्म राहत पुग्ने सुनिश्चित गर्न सरकारले ‘वान डोर’ नीति अघि बढाएको बताए । राहत वितरणअघि र पछि आवश्यक जानकारी सरकारलाई उपलब्ध गराउनुपर्ने उनको भनाइ थियो ।
उनले पछिल्लो विपद् सामान्य बाढीभन्दा फरक प्रकृतिको रहेको बताए । नुवाकोटको विदुर पुगेर प्रभावित क्षेत्रको अवस्थाबारे जानकारी लिएको उल्लेख गर्दै उनले रसुवा र नुवाकोटका थुप्रै बस्तीमा विपद्ले ठूलो असर गरेको बताए ।
एनआरएनएका अध्यक्ष डा. हेमराज शर्माले संघले बाढी प्रभावितका लागि प्रारम्भिक चरणमा पाँच करोड रुपैयाँ बराबरको राहत सहयोग गर्ने योजना बनाएको बताए ।
उनका अनुसार बाढी आएको भोलिपल्टदेखि नै एनआरएनएका पदाधिकारी तथा स्वयंसेवकहरू प्रभावित क्षेत्रमा पुगेर राहत वितरणमा जुटेका छन् । नुवाकोटको विदुर नगरपालिकाका विभिन्न क्षेत्रमा पहिलो र दोस्रो दिन राहत सामग्री वितरण गरिएको उनले बताए ।
त्यसैगरी एनआरएनए एनसीसी चीनका प्रतिनिधिहरूले रसुवाका विभिन्न क्षेत्रमा पुगेर बालबालिकाका लागि लत्ताकपडा वितरण गरेको र एनआरएनएको हेल्थ कमिटीको संयोजनमा स्वास्थ्य शिविरसमेत सञ्चालन गरिएको अध्यक्ष शर्माले जानकारी दिए ।
उनले सरकारसँग समन्वय गरेर प्रारम्भिक राहतदेखि पुनर्निर्माणसम्म सहयोग गर्ने प्रतिबद्धता व्यक्त गरे ।
अध्यक्ष शर्माले एनआरएनएको पाँच करोड रुपैयाँ सहयोग प्रारम्भिक रूपमा प्रतीकात्मक सुरुवात भएको भन्दै पुनर्निर्माणका क्रममा त्यसभन्दा बढी सहयोग गर्न सकिने बताए ।
उनका अनुसार हाल एनआरएनएका राष्ट्रिय समन्वय परिषद्मार्फत विदेशमा रहेका गैरआवासीय नेपालीहरूबाट राहतका लागि रकम संकलन भइरहेको छ । पछिल्ला केही दिनमै करिब साढे ६ करोड रुपैयाँ बराबरको सहयोग प्रतिबद्धता प्राप्त भइसकेको उनले बताए ।
शर्माले प्रभावित पाँच जिल्लाका परिवारका सदस्यहरू ठूलो संख्यामा विदेशमा रहेकाले उनीहरूसँग समन्वय गरी परिवारसम्म सहयोग पुर्याउने काममा पनि एनआरएनए केन्द्रित रहेको बताए ।
उनले गैरआवासीय नेपालीहरूले आर्थिक सहयोगसँगै सम्बन्धित देशका सरकार, नागरिक तथा संघसंस्थामार्फत नेपालमा भएको विपद्बारे जानकारी गराउने कामसमेत गरिरहेको बताए ।
अध्यक्ष शर्माले पुनर्निर्माणका क्रममा नेपाललाई आवश्यक पर्ने दक्ष जनशक्ति उपलब्ध गराउनसमेत एनआरएनए तयार रहेको बताए ।
प्रतिक्रिया दिनुहोस्
