काठमाडौं । उपराष्ट्रपति रामसहाय प्रसाद यादवसँग नेपालका लागि साउदी अरेबियाका राजदूत फाहद मोहम्मद ए. मनिकरले शिष्टाचार भेटवार्ता गरेका छन् ।
शुक्रबार लैनचौरस्थित उपराष्ट्रपतिको कार्यालयमा भएको भेटमा नेपाल–साउदी द्विपक्षीय सम्बन्ध, नेपाली आप्रवासी कामदार, आर्थिक सहयोग तथा नेपालमा हालै आएको विनाशकारी बाढीलगायत विषयमा छलफल भएको थियो ।भेटमा उपराष्ट्रपति यादवले सन् १९७७ मा नेपाल र साउदी अरेबियाबीच कूटनीतिक सम्बन्ध स्थापना भएदेखि नै दुई देशबीच सौहार्दपूर्ण सम्बन्ध रहँदै आएको बताए । उनले पूर्वाधार, सूचना प्रविधि, ऊर्जा, पर्यटन, खानी तथा कृषिलगायत क्षेत्रमा साउदी अरेबियाबाट थप लगानी तथा सहयोगको अपेक्षा रहेको बताए ।
यादवले साउदी अरेबिया नेपाली आप्रवासी कामदारका लागि प्रमुख गन्तव्य रहेको उल्लेख गर्दै नेपाली श्रमिकलाई रोजगारीका अवसर प्रदान गरेकोमा साउदी सरकारप्रति धन्यवाद व्यक्त गरे । सन् २०२७ मार्चमा नेपाल–साउदी कूटनीतिक सम्बन्ध स्थापनाको स्वर्ण महोत्सव मनाउने तयारी भइरहेको भन्दै उनले यसलाई अर्थपूर्ण र स्मरणीय बनाउन आवश्यक कार्यक्रम आयोजना गर्नुपर्नेमा जोड दिए ।
नेपाल–साउदीबीच गत अगस्ट ३१ मा द्विपक्षीय हवाई सेवा सम्झौता भएकोमा खुशी व्यक्त गर्दै यादवले उक्त सम्झौताले पर्यटन, व्यापार, लगानी तथा जनस्तरको सम्बन्ध विस्तारमा योगदान पु¥याउने विश्वास व्यक्त गरे । उनले जलवायु परिवर्तनका प्रतिकूल प्रभाव सामना गर्न नेपाललाई अन्तर्राष्ट्रिय सहयोग आवश्यक रहेको पनि बताए ।
साउदी राजदूत मनिकरले नेपालमा हालै आएको विनाशकारी बाढीबाट भएको जनधनको क्षतिप्रति दुःख व्यक्त गर्दै नेपाललाई विभिन्न क्षेत्रमा सहयोग गर्न साउदी अरेबिया तयार रहेको बताए । आफ्नो कार्यकालमा नेपाल–साउदी सम्बन्धलाई थप सुमधुर बनाउन निरन्तर प्रयास गर्ने उनले प्रतिबद्धता जनाए ।
प्रतिक्रिया दिनुहोस्
