कटन क्याण्डीमा अखाद्य रङको प्रयोग गर्दा मानव स्वास्थ्यमा गम्भीर असर

काठमाडौँ । कटन क्याण्डीमा अखाद्य रङ प्रयोग गरिएकाले नखान विभागले आग्रह गरेको छ । कटन क्याण्डीमा ‘रोडामाइन वी’को प्रयोग गरिएकाले मानव स्वास्थ्यमा गम्भीर असर पर्ने भएकाले नखान खाद्य प्रविधि तथा गुण नियन्त्रण विभागले आग्रह गरेको हो ।

खाद्य प्रविधि तथा गुण नियन्त्रण विभागका प्रवक्ता कृष्णमोहन महर्जनले काठमाडौँ विभिन्न स्थानका सडकपेटी, मेलाबजारमा बेच्न राखिएका रङ्गिन कटन क्याण्डीमा मानव स्वास्थ्यमा गम्भीर असर पुर्याउने खालका अखाद्य रङ रोडामान वीको प्रयोग गरिएकाले नखान आग्रह गरिएको बताएका छन् । उनले खुलारुपमा बिक्री वितरण गरिरहेका कटन क्यान्डीको उपभोग नगर्न र आफ्ना बालबालिकालाई नदिनसमेत अनुरोध गरेका छन् ।

विभागले अखाद्य रङ्गको प्रयोग गरी कटन क्यान्डी उत्पादन तथा बिक्री वितरण नगर्न-नगराउनसमेत सबैलाई अनुरोध गरेको छ । ‘कतै अखाद्य रङ प्रयोग गरी कटन क्यान्डी उत्पादन तथा बिक्री विवरण गरेको पाइएमा खाद्य ऐन नियमबमोजिम कारबाही हुने व्यवहोरा सबैलाई जानकारी गराइन्छ’, विभागद्वारा जारी सूचनामा भनिएको छ । कान्ति बाल अस्पतालका निर्देशक डा पङ्कज रायले कटन क्यान्डीमा चिनीको मात्रा बढी, प्राकृतिक केमिकल, अखाद्य पदार्थ रहने भएकाले बालबालिकाको स्वास्थ्यमा प्रत्यक्ष असर गर्ने बताएका छन् ।

उनका अनुसार कटन क्यान्डीले दाँतमा किरा लाग्ने, तौल बढाउने, स्मरण शक्तिमा कमी, पिसाबमा रङ देखिनेलगायत समस्या हुने गर्दछ ।