राष्ट्रिय प्रजातन्त्र पार्टीले गर्यो संसद वहिष्कार

काठमाडौं । राष्ट्रिय प्रजातन्त्र पार्टीले आज पनि संसद बहिष्कार गरेको छ । शुक्रबार प्रतिनिधि सभाको बैठक विरोध हुँदा पनि चलेको भन्दै राप्रपाले संसद बहिष्कार गरेको राष्ट्रिय प्रजातन्त्र पार्टीका सांसद ज्ञानेन्द्र शाहीले बताए ।

उनले भने, ‘जनताले दिएको विश्वासलाई घात नगरौं । अन्यायको महल कति दिन टिक्ला र झुटको पर्दाले कति दिन छेकिएला । आज नभए भोलि त ढल्नैपर्छ । किनकी सत्यको जित निश्चित हुन्छ । जबसम्म यो भिजिट भिसा प्रकरणमा छानबिन समिति बन्दैन् तबसम्म अवरोध जारी रहन्छ । संसदमा एउटा दलको पनि त्यतिकै हैसियत हुन्छ, एकजना सांसदको पनि त्यति नै हैसियत हुन्छ । विरोध हुँदा पनि संसद चल्छ भने राप्रपाले आज पनि संसद बहिष्कार गर्छौ ।’

यस्तै, उनले भिजिट भिसा प्रकरण कुनै दल विशेषको मुद्दा नभएको भन्दै सम्पूर्ण राजनीतिक दल र संसदीय दलका सांसदहरुलाई राप्रपाको तर्फबाट मानव बेचविखनविरुद्ध एकजुट हुन अपिल पनि गरेका छन् ।

उनले भने, ‘यो भिजिट भिसा प्रकरण कुनै दल विशेषको मुद्दा होइन् । सम्पूर्णको साझा मुद्दा हो । एकजना गृहमन्त्रीको कुरा होईन, यो १४ वटा गृहमन्त्रीको कुरा हो । २०६४ सालदेखिको कुरा हो । त्यसैले सम्पूर्ण राजनीतिक दल र संसदीय दलका सम्पूर्ण सांसदहरुलाई राप्रपाको तर्फबाट अपिल छ हामी एक ठाँउमा आउ । मानव बेचविखनविरुद्ध एकजुट बनौं ।’