बैंक र ब्राण्ड डुबाएको आरोप लागेका न्यौपानेका दुई राइट ह्याण्डको जिम्मेवारी खोसियो, खनियाँलाई बैंक छोड्न शाक्यको अनुरोध !

काठमाडौँ । एनआईसी एशिया बैंकले बैंक र बैंकको ब्राण्ड डुबाउन तत्कालीन सीइओ रोशन न्यौपानेको राइट ह्याण्ड भएर काम गरेका दुई कर्मचारी अर्जुन खनियाँ र दीपेन कार्कीको जिम्मेवारी खोसिएको छ । बैंकले खनियाँको सूचना अधिकारीको जिम्मेवारी खोसेर जयन्द्र रावललाई दिएको छ भने दीपेन कार्कीको कम्पनी सचिवको भूमिका खोसेर कमल खड्कालाई दिएको छ ।

कार्की आफ्नै कर्मचारीमाथि यौन दुर्व्यवहार गरेको केसमा विवादित व्यक्ति हुन् भने खनियाँ उनै कार्कीलाई बचाउन खोजेको लगायतका आधा दर्जन बढी केसका आरोपित हुन् । सुजित शाक्यले २०१७ मा आफुले बैंक छोडेपछि यी दुईले बैंकमा सबैभन्दा बढी रजाई गरेको निष्कर्ष निकाल्दै उनीहरुको जिम्मेवारी खोस्ने बारे जयन्द्र रावलसँग सल्लाह गरेका थिए ।

जयन्द्र रावलले यसमा स्वीकृति दिएपछि अन्तत: दुई जनाको जिम्मेवारी खोसिएको हो । यता शाक्यले खनियाँलाई बैंक छोड्न निर्देशन दिएको बैंकका एक संचालकले जानकारी दिए । राष्ट्र बैंक शाक्य स्वयमले मिलाउने र मिडिया व्यवस्थापन रावलले नै गर्ने भन्दै खनियाँलाई बैंक छोड्न भनिएको हो । यस विषयमा खनियाँ भने बोल्न मानिरहेका छैनन् ।

यता यो समाचार प्रकाशनपछि सम्पर्कमा आएका बैंकका असिष्टेन्ट सीइओ जयन्द्र रावलले आफुहरुले खनियाँलाई बैंक छोड्न नभनेको दाबी गरेका छन् । ‘उहाँका जिम्मेवारीहरु परिवर्तन भएका छन् । तर, बैंक छोड्न नै भनेको कुरा भने गलत हो ।’ उनले भने ।