Exclusive : कुमारी बैंकमा ‘चोर बाटो’बाट पुनर्नियुक्तिका नाममा १८ जनाको ‘गैरकानुनी बढुवा’ ! (इन्टरनल मेमोसहित)

काठमाडौँ ।  कुमारी बैंक लिमिटेडका सीइओ राम चन्द्र खनाल र डेपुटी सीइओ सुधिर नाथ पाण्डेमाथि कर्मचारी विनियमावली, र प्रचलित कानुनलाई मिचेर १८ जनाको गैरकानुनी रुपमा बढुवा गरेको आरोप लागेको छ । बैंकले २१ नोभेम्बर, २०२५ मा एक पत्र जारी गरेर १८ जनाको पुनर्नियुक्ति गरिने भन्दै पत्राचार गरेपछि यो विषय बाहिर आएको हो ।

१८ जनाको पुनर्नियुक्ति  कसरी भयो गैरकानुनी ?
बैंकको एचआर विभागमै कार्यरत कर्मचारीका अनुसार कर्मचारीलाई उपल्लो तहमा बढुवा गर्न दुई विकल्प हुन्छन् । पहिलो, ती कर्मचारीहरुलाई उनीहरुको कामको मूल्यांकन अनुसार उनीहरुलाई बढुवा गरिनुपर्छ, दोश्रो भ्याकेन्सी निकालेर उनीहरुसमेत लडेर नाम निकालेको खण्डमा माथिल्लो तहमा नियुक्त हुन पाउने व्यवस्था छ । तर, कुमारी बैंकको यो केसमा १८ जनाको मात्र सूची छ, जसका कारण यो बढुवासूची होइन । बढुवा हुँदा बैंकले छुट्टै बढुवासूची नै निकाल्छ । सोहि बढुवा सुची ननिकाल्न बैंकले यसलाई एक्सटर्नल भ्याकेन्सी भनेको छ । तर, न बैंकले कतै भ्याकेन्सी निकालेको छ, न भ्याकेन्सी उपरका प्रक्रिया निभाएको छ । बैंकले त सिधै, २३ जनवरी २०२६ सम्म अहिलेकै पोजिसनमा काम गर्ने र त्यसपछि १२ फेब्रुअरी अर्थात २९ माघ २०८२ अगाडी माथिल्लो पदमा नियुक्त हुन भनेको छ ।

छोटोमा बुझ्दा बैंकले तल्लो तहमा काम गरिरहेकाहरुलाई विना भ्याकेन्सी माथिल्लो तहमा छानीछानी बढुवा गरेको र सो व्यवस्था कर्मचारी विनियमावली अनुसार नभएको कर्मचारीको दाबी छ ।

बैंकभित्र तीब्र आलोचना, तर सीइओको डरले बोल्ने आँट गर्दैनन् कर्मचारी !
बैंकका कर्मचारीका अनुसार यसरी गैरकानुनी रुपमा १८ कर्मचारीलाई बढुवा गरेको विषयमा बैंकभित्रका कर्मचारीले पनि आवाज उठाउन केहि कर्मचारीले खोजेका थिए । तर यसअघि, विभिन्न कर्मचारीलाई हुँदै नभएको आरोप लगाएर मुद्धा मामिला भोग्न लगाइएको, र सोहि कारण कतिपयले त जागिर नै छोडेको देखेका कर्मचारीले यस विषयमा खुलेर बोल्न सकेका छैनन् । खुलेर बैंकभित्र बोल्न नसके पनि कतिपय कर्मचारीले भित्री रुपमा मिडिया, राष्ट्र बैंक र अख्तियार गुहारेको बताएका छन् । ‘कसैलाई तृप्ति राणालाई जस्तो सीइओले मुद्धा हालिदेलान् भन्ने पीर छ, कतिपय साथीहरुलाई किरण सापकोटाजस्तै जागिर छोड्नुपर्ने हो कि भन्ने पीर छ ।’ यस विषयमा बैंकको मेमोसहित अर्थ खबरको सम्पर्कमा आएका एक कर्मचारीले भने, ‘तृप्तिले अदालतबाट सफाई पाइन्, तर दुख पाइन् । किरण सापकोटाले मुद्धामामिला भोग्न चाहेनन्, उनले जागिर नै छोडे । अरु कतिले जागिर छोडे छोडे । हाम्रो बैंकमा अहिले बोल्न खोज्नेलाई छानी छानी दुख दिने र निकाल्ने गरिएको छ ।’

उनले सुरुमा कर्मचारी युनियन कमजोर पारेर बोल्न बाट रोकिएको र त्यसपछि बैंकमा मनपरी सुरु भएको दाबी गरे ।  ‘कर्मचारी युनियनका अध्यक्ष किरण सापकोटालाई बैंकबाट निकालियो, बैंकबाट निस्किन नमान्ने तृप्ति रानालाई अनेक मुद्धा मामिलाको झमेला लगाइयो । त्यसपछि कर्मचारी त्रसित छन् । न बढुवाको सूची आएको छ, न भ्याकेन्सी छ । अनि मन परेका १८ जनालाई फुत्त बढुवा गर्न कसरी मिल्छ ? बढुवा हो भने सूची खोई ? बढुवा होइन भने भ्याकेन्सी छापेको खोई ? जे मन लाग्यो, त्यहि गरेर हुन्छ ?’

सो मेमोमा बैंकका डेपुटी सीइओ सुधिरनाथ पाण्डे र बैंकका सीइओ रामचन्द्र खनालले सहि गरेका छन् । बैंकका कर्मचारीका अनुसार यो मेमो कानुनसम्मत नभएको भन्दै सुधिर नाथ पाण्डेले एक्लै हस्ताक्षर गर्न मानेका थिएनन् । त्यसपछि राम चन्द्र खनालले पनि सो मेमोमा हस्ताक्षर गरेका हुन् । सुधिरनाथ पाण्डे एनआईसी एशियालाई उँधोगति लगाउन महत्वपूर्ण भूमिका खेलेर बैंक लगभग गाह्रो अवस्थामा पुग्यो भनेपछि विभिन्न बहाना झिकेर बैंकमा निस्किएका व्यक्ति हुन् । राम चन्द्र खनालले पनि कर्मचारी युनियनलाई निकै कमजोर बनाएर अहिले यस्तै विवादित काम गरिरहेको आरोप कर्मचारीको छ ।

के भन्छ बैंक ?
यस विषयमा बुझ्न हामीले बैंकका सीइओ राम चन्द्र खनाललाई नै सम्पर्क गरेका थियौँ । तर उनको फोन अफ भएपछि हामीले बैंकका सूचना अधिकारी चन्दन कार्कीलाई सम्पर्क गरेका थियौँ । चन्दन कार्कीले सुरुमा ‘यस विषयमा कसले सूचना दियो ?’ भनेर उल्टै प्रतिप्रश्न गरे । हामीले सूचनाको स्रोत भन्न नमिल्ने बताएपछि उनले एचआर बाइलजविपरित काम नगरिने र गर्न नहुने बताए । उनले एचआर बाईलजमा उल्लेख भए अनुसार भ्याकेन्सी नछापी, अन्तर्वार्ता नगरी, सम्पूर्ण प्रक्रिया पूरा नगरी बढुवा वा पुनर्नियुक्ति नहुने प्रष्ट पारे । अर्थात, घुमाउरो पारामा उनले सो एचआर बाइलजविपरित गरिएका सबै काम गलत हुने प्रष्ट पारे ।

अर्को अंकमा,
Exclusive :  सीइओ खनालको योजनामा कसरी तयार गरियो ‘फेक रिपोर्ट’ ? प्रमाणसहित विशेष खुलासा
(प्रतिक्षा गर्नुहोस्)

कुमारी बैंकले खनाललाई हटाएर पाण्डेलाई सीइओ बनाउन खोजेको हो ? यसो भन्छ बैंक…

हाकिमको गलत हठले कालोसूचीमा परेको खातामा पनि काररोबार गर्न दिँदा कुमारी बैंक कारवाहीमा !