साल्ट ट्रेडिङ कर्पोरेसनलाई ३ लाख जरिबाना

काठमाडौँ। सरकारी स्वामित्वको साल्ट ट्रेडिङ कर्पोरेसनलाई सरकारलेनै ३ लाख जरिबाना तिराएको छ। चिनीको खरिद–बिक्री र मौज्दात (स्टक) को स्पष्ट विवरण देखाउन नसकेको तथा अनुगमनका क्रममा असहयोग गरेको भन्दै वाणिज्य, आपूर्ति तथा उपभोक्ता संरक्षण विभागले ३ लाख रुपैयाँ जरिबाना गरेको हो ।

विभागका अनुसार कर्पोरेसनले दैनिक खरिद, बिक्री र मौज्दातसम्बन्धी स्टक लेजर उपलब्ध गराउन नसक्दा वास्तविक मौज्दात पुष्टि गर्न सम्भव नभएको र सोही कारण उपभोक्ता संरक्षण ऐन २०७५ अनुसार कारबाही गरिएको हो।

विभागले जरिबाना रकम ७ दिनभित्र बुझाउन निर्देशन दिएको छ भने नबुझाए थप कारबाही हुने चेतावनी समेत दिएको छ। साथै, कर्पोरेसनले चाहेमा ५० प्रतिशत रकम धरौटी राखेर पुनरावलोकनका लागि निवेदन दिन सक्ने व्यवस्था पनि रहेको छ।