‘कम हेण्डसम देखिएको’ भन्दै एनआईसी एशियाका जयन्द्रले गराए वेव साइटमा आफ्नो फोटो परिवर्तन !

काठमाडौँ । मान्छेका रहर पनि अनेक खालको हुने । यस्तै घटनाको पर्दा खुलेको छ एनआईसी एशिया बैंकभित्र । हालसालैमात्र आफुले चाहेको व्यक्ति सीइओ बनाएर, अर्जुन खनियाँको जिम्मेवारीसमेत आफुले लिन भ्याएका जयन्द्र रावलले बैंकको वेव साइटमा आफ्नो फोटो परिवर्तन गर्न लगाएका छन् ।

आफु कम ह्याण्डसम देखिएको भन्दै उनले तत्काल फोटो परिवर्तन गर्न भनेको बैंकका एक कर्मचारीले दाबी गरे । पछिल्लो समय बैंकमा सुजित शाक्यलाई आफुले सीइओ बनाएर ल्याएको र आफुसँग निहुँ खोज्नेलाई एक एक गरी तह लगाउने भन्दै उनले विभिन्न कर्मचारीहरुलाई धम्कीपूर्ण भाषा बोलिरहेका छन् ।

यद्यपी रावलले भने आफ्नो फोटो पूरानो भएकाले परिवर्तन गरेको दाबी गरेका छन् । ‘हेन्डसम देखिएन भनेर होइन, फोटो पूरानो भयो भनेर परिवर्तन गरेको हो ।’ अर्थ खबरसँग कुराकानी गर्दै उनले भने । उनले आफुले ‘मै सीइओ भनेर कसैलाई नधम्क्याएको दाबीसमेत गरे । ‘कसैलाई धम्क्याएको छैन । यो सबै हल्ला मात्र हो ।’ उनले भने ।

यौन दुर्व्यवहारमा मुछिएका बैंकका तत्कालीन कम्पनी सचिव दिपेन कार्कीको उदाहरण दिंदै उनले ‘४० कटेको दीपेनले कोकोले, केके गरिसक्यो, मेरो के फोटो राखेको ? अलि ह्याण्डसम राख्नु’ भन्दै फोटो परिवर्तन गर्न लगाएको दाबी कर्मचारीको छ । उनी सूचना अधिकारी नियुक्त भएको राती नै बैंकको वेव साइटमा उनको फोटो परिवर्तन गरिएको छ । बैंकमा पछिल्लो समय हाकिम भएको फाइदा उठाउँदै कर्मचारीसँग डेट गर्ने चलन बढेको छ । यसका कारण राम्रो काम गर्ने कर्मचारी मारमा परिरहेका छन् । बैंकका तत्कालीन कम्पनी सचिव दीपेन कार्कीले महिला कर्मचारीलाई लिएर डेटिङ्ग गएको खुलासा केहि समय अघि मात्र भएको थियो । बैंकले बैंकभित्रै रक्सी खाएर तास खेल्ने लुम्बिनी प्रदेशका ३ कर्मचारीलाई पनि बर्खास्त गरिसकेको छ । पछिल्लो समय काभ्रे, भक्तपुर लगायतका ठाउँमा पनि सिनियरले जुनियरलाई डेटीङ्ग लिएर जाने क्रम बढेको छ । तर यौन दुर्व्यवहारजस्तो गम्भीर विषयको कुरा उठ्दा पनि बैंकले आफ्ना कर्मचारीलाई कारवाही भने गरेको छैन ।