सन्तोष परियारको नयाँ तीज गीत ‘कमरु फिन्फिनी’ सार्वजनिक

सन्तोष परियारको नयाँ तीज गीत ‘कमरु फिन्फिनी’ सार्वजनिक

काठमाडौं । नेपाली सांगीतिक क्षेत्रका गायक सन्तोष परियारको नयाँ तीज गीत ‘कमरु फिन्फिनी’ सार्वजनिक भएको छ ।

तीज पर्वको मौलिकता, उमंग र सांस्कृतिक रंगलाई समेटिएको गीतमा सन्तोष परियार र चर्चित गायिका शान्तिश्री परियारको स्वर रहेको छ । गीतमा दिपेश राज पुरीको शब्द, दिपकराज विश्वकर्माको लय तथा सन्जय श्रीपालीको संगीत संयोजन रहेको छ ।

तीजको मौलिक भाका, नाचगान र उत्सवको वातावरणलाई केन्द्रमा राखिएको गीतले नेपाली लोकसंस्कृतिलाई थप उजागर गर्ने अपेक्षा गरिएको छ ।

‘कमरु फिन्फिनी’को निर्देशन तथा कोरियोग्राफी प्रशान्त मगर र श्याम पटेलले गरेका हुन् । भिडियोमा आकर्षक नृत्यसँगै तीजको उल्लासपूर्ण वातावरणलाई कलात्मक रूपमा प्रस्तुत गरिएको छ । भिडियोमा चर्चित मोडल जुना बिश्कर्मा र सन्तोष परियारको अभिनय तथा नृत्य रहेको छ । 

भिडियोको छायांकन विशाल थापाले गरेका छन् भने सम्पादन प्रविण भट्टले गरेका छन् । त्यस्तै, श्रृङ्गार सोनिका गजमेरले गरेकी छन् । 

नेपाली नारीहरूको प्रमुख पर्वका रूपमा मनाइने तीजलाई लक्षित गर्दै सार्वजनिक गरिएको ‘कमरु फिन्फिनी’ले तीजको सांगीतिक माहोललाई थप रंगीन बनाउने विश्वास गरिएको छ ।

गीत तथा भिडियो सन्तोष परियार अफिसियल युट्युब च्यानललगायत विभिन्न डिजिटल प्लेटफर्ममार्फत सार्वजनिक गरिएको छ । गीत सार्वजनिक भएसँगै दर्शक तथा स्रोताबाट सकारात्मक प्रतिक्रिया पाउने अपेक्षा गरिएको गायक तथा मोडल सन्तोष परियारले बताए ।

सन्तोष परियार नेपाल प्रहरीमा कार्यरत राष्ट्रसेवकसमेत हुन् । उनी विगत एक दशकदेखि नेपाल प्रहरीमार्फत देश र जनताको सेवामा समर्पित रहँदै आएका छन् । ‘कमरु फिन्फिनी’ यस वर्षको चर्चित तीज गीतमध्ये एक बन्ने अपेक्षा गरिएको उनले बताए ।