शिक्षामा राज्यको लगानी अझै बढाउन आवश्यक छ : मन्त्री पोखरेल

काठमाडौं । शिक्षा तथा खेलकुदमन्त्री सस्मित पोखरेलले शिक्षामा राज्यको लगानी अझै बढाउन आवश्यक रहेको बताएका छन् ।

शिक्षा तथा खेलकुद मन्त्रालयले आयोजना गरेको विद्यालय शिक्षा विधेयकको मस्यौदा तयारी गृहकार्यअन्तर्गत ‘विद्यालय व्यवस्थापन तथा पाठ्यक्रम व्यवस्था’ विषयक परामर्श–गोष्ठीमा बोल्दै मन्त्री पोखरेलले शिक्षामा कुल बजेटको कम्तीमा २० प्रतिशत लगानी गर्नुपर्ने विश्वव्यापी अभ्यास रहेको बताए ।

उनले नेपालमा हाल शिक्षामा कुल बजेटको ११ प्रतिशतभन्दा कम रकम विनियोजन भइरहेको बताए । शिक्षामा थप पाँच अर्ब रुपैयाँ बजेट छुट्याइसकिएको र चालु आर्थिक वर्षमा शिक्षाको बजेट अझै बढ्नसक्ने उनको भनाइ छ ।

उनले भने, ‘आजको दिनमा संघीय सरकारको बजेटको शिक्षामा जति पनि बजेट छ, त्यो कम छ । हामीले सकेसम्म देशकै सिनारियोमा सम्पूर्ण बजेटको २० प्रतिशत बजेट शिक्षामा छुट्याउनुपर्छ भन्ने ग्लोबल प्राक्टिस छ । हामी लगभग ११ प्रतिशतभन्दा कम छौँ, आर्थिक वर्षमा शिक्षामा बढ्छ। ११ प्रतिशतको हाराहारीमा पुग्छ होला, अझ बढी पनि हुन सक्छ ’

मन्त्री पोखरेलले विद्यालय शिक्षा विधेयकको मस्यौदा तयार गर्दा विद्यार्थी, विद्यालय तथा विभिन्न तहका सरकारको सुझावलाई प्राथमिकतामा राख्नुपर्ने बताए ।

उनले परामर्शका क्रममा विद्यार्थीको आवाजलाई केन्द्रमा राखेर सुझाव आएको भन्दै सहभागीहरूलाई धन्यवाद दिए ।

उनले भने, ‘विगतको दिनमा कम विद्यार्थीको आवाज सुनेको थिएँ भने आज अलिकति बढी विद्यार्थीहरूको आवाज सुनियो । जसले विद्यार्थीको आवाजलाई केन्द्रमा राखेर सुझाव दिनुभयो, विद्यालयलाई केन्द्रमा राखेर सुझाव दिनुभयो, सम्पूर्णलाई हार्दिक धन्यवाद दिन चाहन्छु ।’

संघीय, प्रदेश र स्थानीय सरकारबीचको समन्वय र सहकार्यलाई थप प्रभावकारी बनाउन आवश्यक रहेको उनको भनाइ छ । शिक्षासम्बन्धी अधिकार र जिम्मेवारी स्पष्ट पार्दै तीनै तहका सरकारबीच तालमेल बढाउनुपर्ने उनले बताए ।

विद्यालय व्यवस्थापन, पाठ्यक्रम तथा शिक्षासम्बन्धी नीति निर्माणमा सरोकारवालाको सुझाव समेटेर विधेयकलाई अघि बढाउने मन्त्रालयको तयारी रहेको उनले बताए ।