निर्धक्क भएर खेल्नुहोस्, देशको शिर ठाडो पार्नुहोस्‌ : मन्त्री पोखरेल

निर्धक्क भएर खेल्नुहोस्, देशको शिर ठाडो पार्नुहोस्‌ : मन्त्री पोखरेल

काठमाडौं । जापानमा आयोजना हुने २०औँ एसियाली खेलकुदमा सहभागी हुने नेपाली खेलाडी, प्रशिक्षक तथा टोलीका सदस्यलाई बिदाइ गरिएको छ ।

बिहीबार शिक्षा तथा खेलकुद मन्त्रालयमा आयोजित विशेष कार्यक्रममा खेलाडी तथा टोलीका सदस्यलाई बिदाइ गरिएको हो ।

बिदाइ कार्यक्रममा शिक्षा तथा खेलकुद मन्त्री सस्मित पोखरेलले एसियाली खेलकुदमा सहभागी हुने खेलाडीहरूले पछिल्लो केही महिनादेखि गरेको मेहनत, अनुशासन र तयारीको प्रशंसा गर्दै देशको शिर उच्च बनाउने गरी खेल्न आग्रह गरे ।

उनले भने, ‘सर्वप्रथम त खेलाडीहरूले पछिल्लो केही महिना जुन किसिमले सेल्फ–डिसिप्लिनमा बस्नुभयो, मेहनत गर्नुभयो, नेपाललाई प्रतिनिधित्व गरेर जानको लागि जुन तपाईंहरूको तयारी छ, त्यसको सम्पूर्ण तपाईंहरूको मेहनतको लागि म सम्पूर्णलाई हार्दिक धन्यवाद पनि व्यक्त गर्न चाहन्छु र यहाँहरूलाई बधाई पनि व्यक्त गर्न चाहन्छु।’

मन्त्री पोखरेलले खेलाडीका लागि नतिजाभन्दा देशको प्रतिनिधित्व गर्दै गरेको मेहनत, परिश्रम, अनुशासन र त्याग महत्वपूर्ण रहेको बताए ।

उनले भने, ‘तपाईंहरूको मेहनतले नेपालको शिर एकदम उच्च बनाउनुहुन्छ भन्ने कुरामा हामी पूर्ण हामीले विश्वास लिएका छौँ। अघि एक जना खेलाडीले पनि भन्नुभयो, हाम्रो लागि रिजल्ट जेसुकै होस्, त्यो दोस्रो कुरा हो, सेकेन्डरी कुरा हो। पहिलो कुरा के हो, देशलाई प्रतिनिधित्व गरेर, राज्यको सीमित लगानीमा तपाईंहरूले जति मेहनत गर्नुभएको छ, देशलाई प्रतिनिधित्व गर्न जानुभएको छ, सबैभन्दा गर्वको कुरा हाम्रो लागि, सरकारको लागि, मन्त्रालयको लागि सबैभन्दा महत्त्वपूर्ण कुरा त्यो हो।’

उनले खेलाडीलाई जापानमा निर्धक्क भएर खेल्न र खेलभावनालाई कायम राख्न आग्रह गरे ।

उनले भने, ‘जतिखेर खेल्नुहुन्छ, तपाईंहरू निर्धक्क भएर नडराईकन खेल्नुहोला । धेरै आफूलाई तनाव लिनुहुन्न । तपाईंले आफ्नो बेस्ट दिने हो। जाँदाखेरि जापानमा गएर देशको शिर ठाडो पार्ने गरी अनुशासनको साथ खेल्नुहोला। स्पोट्र्सम्यानसिप राम्रोसँग प्रयोग गर्नुहोला। सबैभन्दा महत्त्वपूर्ण कुरा भनेको त्यही नै हो।’

मन्त्री पोखरेलका अनुसार २०औँ एसियाली खेलकुदमा नेपालबाट विभिन्न २१ खेलमा ५७ महिला र ७८ पुरुष गरी १३५ खेलाडी सहभागी हुनेछन् । टोलीमा २९ प्रशिक्षक, १७ व्यवस्थापक तथा खेल प्राविधिक, ६ जना मेडिकल टिम, ४ जना पत्रकार तथा विशिष्ट अतिथि, सेफ द मिसन, डेपुटी सेफ द मिसन र अन्य अफिसियलसहित कुल २११ जना सहभागी हुनेछन् ।

नेपालबाट आर्चरीमा २, एथलेटिक्समा ६, ब्याडमिन्टनमा ४, बक्सिङमा ७, क्रिकेटमा १५, साइक्लिङमा २, गल्फमा ४, जुडोमा ६, कबड्डीमा २४, करातेमा ८, र्‍याफ्टिङमा २, स्केट एवं स्केटबोर्डिङमा २, सफ्ट टेनिसमा ४, स्क्वास र्‍याकेटमा २, पौडीमा ५, टेबल टेनिसमा ६, तेक्वान्दोमा ३, टेनिसमा ५, भलिबलमा १२, कुस्तीमा ६ र उसुमा १० जना खेलाडी सहभागी हुनेछन् ।

मन्त्री पोखरेलले कराते टोली जापान गइसकेको र अन्य खेलका टोलीहरू विभिन्न मितिमा जापान जाने जानकारी दिए । उनले आधिकारिक रूपमा एसियाली खेलकुदमा नेपाललाई प्रतिनिधित्व गर्ने टोलीको संख्या २११ जना रहेको स्पष्ट पारे ।

उनले यसपटक नेपालमा पहिलोपटक एसियाली खेलकुदमा सहभागी हुने खेलाडी, प्रशिक्षक तथा टोलीका सदस्यलाई विमानस्थलबाट भीआईपी तथा भीभीआईपी एक्सेसमार्फत बिदाइ गर्ने व्यवस्था गरिएको बताए ।

उनले भने, ‘कराते टोली गइसक्नुभएको छ, बाँकी पनि सबै टोलीलाई पहिलोपटक हामीले एयरपोर्टबाट भिआइपी, भिभिआइपी एक्सेसबाट सबैजनालाई पठाउन पाउँदा सानो कुरा हो, ठुलो कुरा होइन, तर यहाँहरूले गर्नुभएको मेहनत, यहाँहरूले गर्नुभएको परिश्रमको एउटा सानो उपहार मात्र हो।’

मन्त्री पोखरेलले आगामी दिनमा खेलाडीहरूले पाउनुपर्ने सम्मान र सुविधालाई थप व्यवस्थित गर्दै लैजाने प्रतिबद्धता जनाए ।

उनले एसियाली खेलकुदबाट फर्किएपछि खेलाडीहरूसँग अनुभव लिने र आगामी प्रतियोगिताका लागि आवश्यक तयारी तथा सुधारका विषयमा छलफल गर्ने बताए ।