एनआईसीमा सजायमा पनि विभेद, बैंकभित्र रक्सी खानेलाई निलम्बन, इण्ट्रनलाई यौन प्रस्ताव राख्नेलाई भएन सजाय

काठमाडौं । ‘सानालाई ऐन, ठूलालाई चैन’ भनेजस्तै एनआईसी एशिया बैंकमा सजायमा समेत विभेद भएको खुलासा भएको छ। बैंकभित्र रक्सी खाइ तास खेलेको आरोपमा तीन कर्मचारीलाई तत्काल निलम्बन गरिँदा इण्ट्रनलाई खुलेआम यौन प्रस्ताव राख्ने तत्कालीन कम्पनी सचिव (जो अहिले पनि बैंकमै कार्यरत छन्)लाई भने कुनै कारबाही नगरेको पाइएको हो।

दुवै घटना प्रमाणसहित पुष्टि भइसकेका थिए। कपिलवस्तु–तौलिहवास्थित शाखामा असोज ३१ गते शुक्रबार राति शाखा प्रबन्धक निरज भुसालसहितका कर्मचारी रक्सी खाई तास खेलिरहेको अवस्थामा फेला परेपछि प्रहरीले समातेको थियो। यसअघि बैंकका तत्कालीन कम्पनी सचिव दिपेन कार्कीलाई पनि प्रहरीले पक्राउ गरी एक दिन थुनामै राखेको थियो।

तर, बैंकभित्र रक्सी खाएर तास खेल्ने कर्मचारीलाई तत्काल कारबाही गरे पनि आफ्नै इण्ट्रनलाई यौन प्रस्ताव राखेर मुद्दा प्रहरीसम्म पुगेका कार्कीलाई बैंकले कुनै कारबाही गरेको छैन।

कार्कीलाई कारबाही नगरेपछि बैंकका अन्य अधिकारीहरूले पनि कर्मचारीलाई यौन प्रस्ताव राख्ने, डेटिङमा जान दबाब दिने काम बढाएको कर्मचारीहरू बताउँछन्। जागिरको प्रलोभन देखाएर मनपरी गर्नेहरू निर्भीक बनेका बेला पनि यस्तो गलत कार्यको सुरुवात गर्ने कार्कीमाथि भने बैंक मौन देखिएको छ।

कर्मचारीहरूको भनाइअनुसार, बैंकका अन्य हाकिमहरूको ‘काण्ड’ पनि बाहिर ल्याइदिने धम्की दिएपछि कार्कीलाई कारबाही नगर्ने निष्कर्षमा बैंक पुगेको हो। विषय यति धेरै सार्वजनिक भइसके पनि कार्की हालसम्म यसबारे खुलेर बोल्न तयार भएका छैनन्।

यस घटनाबारे बुझ्न खोज्दा बैंकका सूचना अधिकारी जयन्द्र रावलले अचम्मको प्रतिक्रिया दिए। बैंकभित्र रक्सी खाई तास खेल्नेहरूलाई कारबाही गरेको उनले स्वीकारे पनि कार्कीको केसबारे आफूलाई थाहा नभएको दाबी गरे। तर, कार्कीलाई जोगाउने आन्तरिक समूहमा रावल स्वयं समेत परेका छन् भन्ने आरोप कर्मचारीहरूले लगाउँदै आएका छन्।

“रक्सी खाएर बैंकभित्र तास खेलेको घटना थाहा भयो, तिनलाई कारबाही पनि भइसकेको छ। तर दीपेन कार्कीको केसबारे भने मलाई थाहा छैन,” उनले भने।

मिडियामा कार्की पक्राउ परेको खबर सार्वजनिक भइसकेको र प्रमाणहरूसमेत बाहिरिइसकेको भए पनि आफूले नदेखेको दाबी रावलले गरे।