सात विश्व कीर्तिमान बनाएका डा.आशिष विष्ट भन्छन् : देशमै केही गर्न चाहन्छु

सात विश्व कीर्तिमान बनाएका डा.आशिष विष्ट भन्छन् : देशमै केही गर्न चाहन्छु 

काठमाडौं । डा.आशिष विष्टले आफूले विश्वस्तरमा सातवटा शैक्षिक कीर्तिमान तथा चारवटा ग्लोबल उपाधि हासिल गरेको प्रमाणहरु सार्वजनिक गरेका छन् । 

शनिबार राजधानीको संवाद डबलीमा पत्रकार सम्मेलनको आयोजना गरी आफूले अन्तराष्ट्रिय स्तरबाट हासिल गरेको उपाधि, ज्ञान, अनुभव र सीपलाई देश सेवामा प्रयोग गर्न स्वदेश आएको बताएका छन् ।

डा.विष्टले आफू नेपालमा जन्मिएर नेपाल, भारत, बेलायत र अष्ट्रेलियासहित ४ देशमा उच्च शिक्षा हासिल गरेको र ७ शैक्षिक विश्व रेकर्ड सहित विश्व नम्बर १ बन्न सफल भएको बताए । उनका अनुसार ‘वल्र्ड बुक अफ रेकर्डस लण्डन’ले आफूलाई सात वटा विश्व कीर्तिमान प्रदान गरेको जनाए ।

डा.विष्टका अनुसार उनले एफसीसीए, एमए, स्वर्ण पदकसहित पीएचडी, बेलायतबाट एमएससी एकाउण्टिङ एण्ड फाइनान्स तथा अस्टे«लियाबाट मास्टर अफ अकाउण्टिङ गरी पाँचवटा एड्भान्स डिग्री हासिल गरेको जनाए ।

उनले चारवटा ग्लोबल टाइटल समेत प्राप्त गरेको बताएका छन् । तीमध्ये स्नातकोत्तर तहमा सबैभन्दा धेरै शैक्षिक विश्व कीर्तिमान, सबैभन्दा धेरै सम्मानित चार्टर्ड एकाउन्टेन्ट(सिए) हासिल गरेको जनाए ।

त्यसैगरी सबैभन्दा उच्च शैक्षिक योग्यता भएको ज्योतिषी र सबैभन्दा धेरै शैक्षिक पुरस्कार प्राप्त व्यक्ति सम्बन्धी उपाधि रहेको उनको भनाई छ ।

उनले आफ्नो उपलब्धि तथा यात्राका बारेमा विभिन्न अन्तर्राष्ट्रिय तथा नेपाली सञ्चारमाध्यममा समाचार प्रकाशित भएको पनि जानकारी दिए ।

यूएसए टुडे, याहु फाइनान्स, विजनेस इन्साईडर, द ग्लोब एण्ड माइल, द हिमालयन टाइम्स, गोरखापत्र, अन्नपूर्ण पोस्ट, र रातोपाटी लगायतमा आफ्नो कीर्तिमानीबारे जानकारी छापिएको जनाए ।

डा.विष्टले नेपाललाई अन्तर्राष्ट्रिय स्तरमा नयाँ पहिचान दिलाउन र नेपाली युवालाई शिक्षा तथा अनुशासनका माध्यमबाट अघि बढ्न प्रेरित गर्न आफू प्रतिबद्ध रहेको बताए ।

‘मेरो यात्रा, मेरा चार विश्व उपाधि, सात विश्व कीर्तिमान, पाँच एड्भान्सड डिग्री र नेपाल फर्किने निर्णयको उद्देश्य एउटै हो—नेपालको विकास र नेपाली युवाको प्रेरणा,’ उनले बताए ।

आफूले अब नेपालमा मुख्य गरेर अडिट तथा वित्तीय परामर्श, ज्योतिष सेवा, एआई अनुसन्धान तथा प्रविधि, मिडिया साझेदारी तथा ब्राण्ड एम्बेसेडर र पर्सन स्कीमा सर्भिस गरेर पाँच क्षेत्रमा काम गर्ने मुख्य इच्छा रहेको बताए ।

उनले नेपाल हरेक हिसाबले सम्भावना रहेको तथा युवाहरुको लागि उर्वर भूमि रहेको बताउँदै आफूले हासिल गरेको सफलतालाई युवा प्रेरित गर्ने माध्यम बनाउने मुख्य लक्ष्य रहेको दाबी गरे ।

आफूले कक्षा १२ पढेर बीचमा ११ वर्ष नपढी ३० वर्षको उमेरमा पुन सुरु गरेर सात वर्षमा स्नातकदेखि विद्यावारिधी तथा सात विश्व कीर्तिमान कायम गरेको बताउँदै आफ्नो कीर्तिमानलाई उनले तोड्न गाह्रो हुने जिकिर गरे ।