बाढी प्रभावित क्षेत्रमा करिब २० हेलिकोप्टर उडान, प्रतिकूल मौसम र विकट भूगोल चुनौति

काठमाडौं । विनाशकारी बाढीका कारण क्षतिग्रस्त रसुवा र नुवाकोट क्षेत्रमा नेपाली सेना र विभिन्न अन्तर्राष्ट्रिय टोलीले बृहत् मानवीय सहायता तथा विपद् उद्धार (एचएडीआर) अभियान जारी राखेको छ ।

बाढीका कारण उर्लिएको तादी नदीमाथि नेपाली सेनाका सैन्य इन्जिनियरिङ टोलीले डोरीको पुल निर्माण गरिरहेका छन्।

राष्ट्रिय सडक सञ्जालबाट सम्पर्कविच्छेद भएका क्षेत्रलाई पुनः सडक सञ्जालसँग जोड्न पुल निर्माण भइरहेको हो।

यससँगै प्रतिकूल मौसमका बीच प्रभावित क्षेत्रमा राहत सामग्री पु¥याउन र अलपत्र परेका नागरिकको उद्धार गर्न हवाई उद्धार तथा राहत अभियान पनि चौबिसै घण्टा सञ्चालन भइरहेको छ।

नेपालमा उद्धार तथा राहत अभियान तीव्र पारिएको दृश्यसहित नेपाली सेनाले सामाजिक सञ्जाल ‘एक्स’ मार्फत जानकारी सार्वजनिक गरेको छ।

नेपाली सेनाले ‘एक्स’मा गरेको अर्को पोस्टमा अन्य निकायसँगको समन्वयमा नुवाकोट र रसुवा जिल्लाका अत्यधिक प्रभावित क्षेत्रमा खोज, उद्धार तथा राहत वितरणका लागि करिब २० वटा हेलिकोप्टर परिचालन गरिएको जनाएको छ।

प्रतिकूल मौसम, विकट हिमाली भूगोल तथा बाढीका कारण प्रयोग गर्न मिल्ने हेलिप्याडको अभावका बाबजुद हवाई टोलीले निरन्तर राहत सामग्री ढुवानी र उद्धार कार्य गरिरहेका छन्।

सेनाले सार्वजनिक गरेका दृश्यमा साँघुरा हिमाली खोँच हुँदै जोखिमपूर्ण अवस्थामा हेलिकोप्टर सञ्चालन गरी विस्थापित परिवारसम्म पुगिरहेको देखाइएको छ।

भोटेकोशी बाढीपछि विकसित घटनाक्रमबारे नेपाल प्रहरीले पनि ‘एक्स’मार्फत जानकारी सार्वजनिक गरेको छ। प्रहरीले विपद्मा परी मृत्यु हुनेको संख्या १ हजार ३४४ पुगेको जनाएको छ।

यसैबीच, भारतले नेपालमा सञ्चालन भइरहेको मानवीय सहायता तथा विपद् उद्धार (एचएडीआर)अभियानमा निरन्तर सहयोग गरिरहेको छ।

रसुवा जिल्लामा आएको भीषण बाढी तथा पहिरोपछि चिलिमे सुरुङमा सञ्चालन भइरहेको उद्धार तथा राहत कार्यलाई अघि बढाउन भारतीय सुरुङ उद्धार टोलीले नेपाली सेनासँग समन्वय गर्दै सुरुङभित्र जम्मा भएको पानी निकाल्ने तथा सुरुङको भित्री भागमा थप गहिराइसम्म उत्खनन गर्ने काम गरेको छ।

उक्त संयुक्त प्रयासले सीमापार विपद् प्रतिकार्यका साथै भारतीय प्राविधिक विशेषज्ञ र नेपाली सुरक्षा निकायबीचको प्राविधिक सहकार्यलाई थप बलियो बनाएको छ।

नेपालका लागि भारतीय राजदूत नवीन श्रीवास्तवले ‘एक्स’मा पोस्ट गर्दै स्थलमै प्राविधिक विशेषज्ञता उपलब्ध गराउनुका साथै आसपासका समुदायलाई मानवीय सहायता प्रदान गर्न भारत प्रतिबद्ध रहेको बताएका छन्।

विशेषज्ञ टोलीले सुरुङभित्र जमेको पानी सफलतापूर्वक निकालेपछि कामदारलाई थप गहिराइसम्म उत्खनन गर्न र जोखिमयुक्त भागलाई सुरक्षित बनाउन सहज भएको छ। भारी मेसिन तथा उच्च क्षमताका उपकरणलाई सुरुङको मुखसम्म पु¥याउन इन्जिनियरिङ टोलीले अस्थायी पहुँच मार्गसमेत निर्माण गरिरहेको छ।

प्राविधिक उद्धार तथा निर्माण कार्यसँगै भारतीय टोलीसँग आएका स्वास्थ्यकर्मीले स्थानीय बासिन्दाका लागि स्वास्थ्य शिविरसमेत सञ्चालन गरेका छन्। शिविरमा स्थानीयको स्वास्थ्य परीक्षण गर्नुका साथै आवश्यक स्वास्थ्य सामग्रीसमेत वितरण गरिएको छ।