वर्तमान सरकार आफ्नै कारणले ढल्छः माओवादी

काठमाडौँ । वर्तमान सरकार आफ्नै कारणले ढल्ने नेकपा माओवादी केन्द्रले दाबी गरेको छ। सोमबार पार्टी अध्यक्ष पुष्पकमल दाहालको निवास खुमलटारमा बसेको पार्टीको पदाधिकारी बैठकपछि सञ्चारकर्मीहरूसँग कुरा गर्दै प्रवक्ता अग्निप्रसाद सापकोटाले सरकार आफ्नै कारणले ढल्ने बताएका हुन्।

उनले देशमा राम्रा काम गरिरहेका कर्मचारीहरुलाई हटाउने खेल भइरहेको आरोप लगाए। सापकोटाले असाधारण परिस्थितिको सामना गर्न सबै पार्टीहरुको बीचमा एकरुपता र समझदारी हुन जरुरी रहेको बताए ।

उनले सरकार राजनीतिक दलहरु फुटाउने चलखेलमा लागिरहेको आरोपसमेत लगाए। संविधान संशोधन अग्रगमन र परिवर्तनको पक्षमा हुनुपर्ने बताए।राष्ट्रियताको सवाल झनझन पेचिलो र जटिल बन्दै गएको तथा लोकतन्त्रका मूल्य, मान्यता र आर्दश कुल्चिने कुचेष्टा भइरहेको आरोप लगाए।