अध्यक्ष दाहाल भन्छन:-‘राष्ट्रियसभाको गरिमालाई उँचो बनाउँछु’

काठमाडौँ । राष्ट्रियसभाका अध्यक्ष नारायणप्रसाद दाहालले राष्ट्रियसभाको गरिमालाई उँचो बनाउने गरी काम गर्ने बताएका छन् । बुधबार चितवनको इच्छाकामना-४ कुरिनटारमा नेपाल कम्युनिष्ट पार्टी (माओवादी केन्द्र)ले गरेको बधाई तथा सम्मान कार्यक्रममा उनले यस्तो बताएका हुन् ।

सो कार्यक्रममा अध्यक्ष दाहालले भने, ‘तपाईंहरुकै कारण आज म राष्ट्रियसभा अध्यक्ष भएको छुँ, तपाईंहरुले गरेको विश्वासलाई आत्मसात् गरेर पदीय दायित्व र मर्यादालाई ध्यानमा राख्दै राष्ट्रियसभाको गरिमालाई उँचो पार्ने गरी काम गर्नेछु ।’ उनले इच्छाकामनाको भूगोलप्रति आफू परिचित रहेको र यहाँको विकास निर्माणमा सक्दो पहल गर्ने प्रतिबद्धता व्यक्त गरेका छन् ।

अध्यक्ष दाहालले २०६४ सालमा इच्छाकामनाका माथिल्लो भेगमा मोटरबाटो नभएकामा आफू निर्वाचित भइसकेपछि सडक निर्माणलगायत विकासका कामको सुरुआत गरेको जनाएका छन् । उनले चुनावमा गरेको वाचाअनुसार दोस्रो पटकको निर्वाचनमा गाडी चढेर मतदाता कहाँ पुगेको स्मरण गरेका छन् ।

त्यस्तै, ‘२०६४ निर्वाचनमा माथिल्लो भेगमा कतै पनि सडक सञ्जाल पुगेको थिएन मैले निर्वाचनमा अर्को पटक भोट माग्न आउँदा गाडी चढेर आउँछु भनेको थिएँ’, उनले भने, ‘दोस्रो पटक निर्वाचनमा भोट माग्न जाँदा गाडी चढेर गएँ । साबिक चार गाविसमध्ये चण्डी भञ्ज्याङ गाविस भवनबाहेक अन्य स्थानमा मोटरबाटो पु¥याउन सफल भएँ ।’ अध्यक्ष दाहाललाई नेकपा (माओवादी केन्द्र) इच्छाकामना गाउँ कमिटीले सम्मान गरेको थियो ।