कोरला नाकामा अध्यागमन कार्यालय स्थापना, भिसा लगाएर वारपार गर्न सकिने

काठमाडौँ । चीनसँग सीमा जोडिएको माथिल्लो मुस्ताङको लोमान्थाङमा रहेको कोरला नाकामा अध्यागमन कार्यालय स्थापना भएको छ । जिल्ला प्रशासन कार्यालय मुस्ताङका अनुसार केही दिनमै अध्यागमन कार्यालयको औपचारिक उद्घाटन गर्ने तयारी छ । मुस्ताङका सहायक प्रमुख जिल्ला अधिकारी रामप्रसाद सुवेदीका अनुसार कार्यालय उद्घाटनको सम्पूर्ण तयारी पूरा भएको छ ।

कार्यालय सञ्चालनमा आएपछि विशेषगरी भेडा च्याङ्ग्रा आयातरनिर्यातमा सहज हुनुका साथै नाकामा आउजाउ तथा व्यापारिक कारोबार सजिलो हुने छ । अध्यागमन कार्यालय स्थापना भएपछि भिसा लगाएर नाका वारपार गर्न सकिने सहायक प्रखुम जिल्ला अधिकारी सुवेदीको भनाइ छ ।

अहिले मुस्ताङवासी मात्र नाका प्रवेश अनुमतिपत्र लिएर आउजाउ गर्ने गरेका छन् । अध्यागमन कार्यालय सञ्चालनमा आएपछि सबै नेपालीले भिसा लगाएर नाका वारपार गर्न पाउने छन् । चिनियाँ पर्यटक पनि भिसा लगाएर यही नाका हुँदै मुस्ताङ आउन पाउने छन् ।

चिनियाँ भन्सारको आमनेसामने पारेर १० कोठे अध्यागमन तथा सुरक्षा पोस्टको भवन बनाइएको छ । आवश्यक पूर्वाधार निर्माण गरी कोरला नाकाबाट एकीकृत सेवा दिने तयारी गरिएको छ ।

नेचुङ भन्सार कार्यालयलाई पनि अध्यागमन कार्यालयसँगै राख्ने तयारी भएको सुवेदीले जानकारी दिए। रासस