सामान्य ‘टोकन अफ अप्रिसिएसन’लाई अवार्ड भन्दै भ्रम छर्दै बैंकहरु, कुमारीबाट सुरु भएको थियो ‘भ्रमको खेती’ !

काठमाडौँ । कुमारी बैंकले न भिसाबाट कुनै अवार्ड पाएको थियो, न कुमारी बैंकले केहि राम्रो काम गरेर कुनै सम्मान पाएको थियो । केहि समय अघि मात्र राष्ट्र बैंकको कारवाही परेको यो विवादित बैंकले पाएको थियो त भिसाले दिएको एउटा सामान्य स्मृति चिनो । सजिलो भाषामा टोकन अफ अप्रिसिएसन । तर कुमारी बैंकले आफुले प्रतिष्ठित अवार्ड पाएको भन्दै दुष्प्रचार सुरु गर्यो ।

यतिसम्म कि बैंकले आफ्नो सामाजिक संजालमा मात्र होइन, मिडियाहरुमा प्रेस रिलिज नै बनाएर पठायो । यतिसम्म कि बैंकले यो अवार्डलाई प्रतिष्ठित अवार्ड भन्न भ्यायो । तर, न यो अवार्ड थियो, न कुनै सम्मान । यो त व्यापार दिने बैंकहरुलाई भिसाले दिने एउटा सामान्य टोकन थियो ।

राष्ट्र बैंकका अधिकारीहरु नै यस्ता सामान्य टोकनलाई अवार्ड भन्न नमिल्ने बताए । ‘यो अप्रिसिएसन टोकन पक्कै हो । तर अवार्ड होइन । अवार्डमा त जुरी हुन्छ, छानिने एउटा तरिका हुन्छ ।’ राष्ट्र बैंकका एक अधिकारीले भने, ‘भिसाले सबैजसो बैंकलाई अवार्ड कसरी दिन्छ र ? यो त सिधासिधा भन्दा व्यापार गरेकोमा धन्यवाद भनेर दिएको एउटा सामान्य टोकन हो ।’

कुमारी बैंकबाट सुरु भएको अवार्डका नामको नौटंकीलाई अरु बैंकहरुले पनि पछ्याएको देखिन्छ । सामान्य टोकन अफ अप्रिसिएसनलाई अवार्ड भनेर कुमारी बैंकले सुरु गरेको झुटको खेतीलाई ‘हामीले पनि त पाएका छौं नि त्यो टोकन’ त भनेर अरु बैंकहरुले पनि अवार्ड नै भन्न भ्याएका छन् । हुँदा हुँदै सबै बैंकले अवार्ड पो पाएछन् भनेर हल्ला चलेको छ यतिबेला । तर फेरि पनि, यो अवार्ड होइन ।

यता बैंकका सूचना अधिकारीले भने यस विषयमा बुझ्न फोन गर्दा फोन नै उठाएनन् ।