अब निजामती कर्मचारीले दुर्गम क्षेत्रमा काम गरेको हुनुपर्ने, नगरे बढुवा नहुने

 काठमाडौँ। अब निजामती कर्मचारीले दुर्गम क्षेत्रमा अनिवार्य काम गरेको हुनुपर्ने भएको छ । सरकारले निजामती कर्मचारीहरु दुर्गम क्षेत्रमा जान नमान्ने गुनासो बढेको भन्दै अनिवार्य रुपमा दुर्गम क्षेत्रमा काम गरेको हुनुपर्ने व्यवस्था गर्न लागेको हो ।

यस्तो व्यवस्था संघीय मामिला तथा सामान्य प्रशासन मन्त्रालयले तयार गरेको निजामती सेवा विधेयकको नयाँ मस्यौदामा उल्लेख गरिएको छ। 

योसँगै अब निजामती कर्मचारीले दुर्गम क्षेत्र र स्थानीय तहको प्रमुख प्रशासकीय अधिकृत पदमा अनिवार्य काम गरेको हुनुपर्नेछ । दुर्गम क्षेत्र र स्थानीय तहको प्रमुख प्रशासकीय अधिकृत पदमा काम नगर्ने कर्मचारीहरुको बढुवा नहुने भएको छ ।

त्यस्तै, निजामती कर्मचारीले आफ्नो पद, अधिकार वा जिम्मेवारी प्रयोग गर्दा व्यक्तिगत, पारिवारिक, व्यवसायिक वा आर्थिक स्वार्थसँग द्वन्द हुने वा हुन सक्ने कुनै पनि कार्यमा संलग्न हुन नपाउने भएका छन् । अर्कोतर्फ सोही मस्यौदामा सरकारले ट्रेड युनियन खारेजदेखि कर्मचारीहरु कुनै पनि राजनीतिक गतिविधिमा संलग्न हुन नपाउने व्यवस्था पनि प्रस्ताव गरेको छ ।